Nikolai Shukoff (Parsifal)
Violeta Urmana (Kundry)
Royal Liverpool Philharmonic (primeira vez en Galicia)
Coro da Ópera Nacional de Brno
Vasily Petrenko, director

“Parsifal”, a derradeira obra mestra de Richard Wagner, un drama existencialista sobre a condición humana que nos últimos anos ten regresado con renovado interese aos principais escenarios operísticos (só no 2004 representouse en Viena, Bayreuth, Londres, Hamburgo e Amsterdam), non se escoitara nunca antes en Galicia. O Xacobeo Classics propón ofrecerlles a todos os afeccionados galegos e a aqueles que nos visiten estes días unha versión en concerto concibida exclusivamente para as celebracións musicais deste Ano Santo.

A orquestra máis antiga de Gran Bretaña e o seu flamante director titular, Vasily Petrenko, artífices da gravación musical máis destacada do 2009 segundo a revista “Gramophone” (o seu rexistro da “Sinfonía Manfred” de Tchaikovski), chegan por primeira vez á nosa comunidade para seren protagonistas desta histórica estrea.

Nikolai Schukoff, elixido polo Festival de Salzburgo para cantar esta mesma ópera no seu próximo certame, ofrecerá aquí o seu aclamado Parsifal, un rol que xa ofrecera con grande éxito en Berlín e Dresde. E Violeta Urmana, a máis interesante Kundry dos últimos anos, interpreta este papel por primeira vez en España, días antes de viaxar a Arxentina para participar coa compañía de La Scala na reinauguración do Teatro Colón, xunto a Daniel Barenboim.